Stori bilong Liklik Hambak Rokrok Loki Inap
Sampela ol wel abus i bin painim hap long stap taim ples bilong ol insait long bikbus i bin bagarap, na ol i bin go stap wantaim sampela ol abus bilong ples long wanpela haus kuk long wanpela ples arere long nambis long Lae, Papua Niugini. Olgeta abus i gat wok bilong ol na hap bilong slip tasol ol i save wok hat olgeta de. Taim liklik grinpela rokrok Loki Inap i bin lusim olgeta famili bilong en, em i bin kam stap long dispela haus kuk. Loki kamap olsem Elvis na i save singsing na danis long karamapim wari bilong en. Loki em wanpela lesbaga na i save kusai planti tu long kisim fri kaikai. Ol arapela abus long haus kuk i luksave long ol pasin bilong em tasol em i save i go moa yet na bagarapim bel bilong ol. Wanpela de em i no bin hamamas taim nogat man i givim kaikai long em na em i mekim kainkain i go na bikman Kande Kaks i kros nogut tru. Tasol Kande Kaks i soim gutpela pasin long Loki na i lainim em long pasin bilong wok bung wantaim long kamapim gutpela sindaun na wanbel. Em nau, tupela i kamap gutpela poro na haus kuk i kamap gutpela ples long i stap.
Industry Reviews
Displa buk "Liklik Hambak Rokrok" em wanpla pani buk stret. Taim mi ridim, mi tu dai long lap tasol, olsem ol poro bilong rokrok.
Em gutpla buk stret long ol papa mama bai laik ridim long ol pikinini long wanem, em i no pani nating, em pani wantaim gutpla leson tu bilong skulim gutpla pasin long pikinini na bikman meri wantaim. - Pearson Vetuna, retired NBC & ABC Broadcaster
Dispela stori bilong Liklik Rokrok Loki i sut stret long mak bilong ol pikinini insait long ol ples bilong Papua Niugini. Yu bai lap o yu bai belhat long kainkain toktok na pasin bilong Loki. Tasol yumi inap long luksave long wanem pasin em i gutpela na bai helpim yumi - pasin bilong les na lukluk long ol arapela, o pasin bilong wok bung wantaim long kamapim gutpela sindaun na wanbel. - Abuc Nagong Daniel - Literacy Trainer, Papua New Guinea.
"Redim yu yet long aigris long ol naispela naispela piksa insait long dispela stori we Joycelin Kauc Leahy i raitim long liklik hambak rokrok, Loki. Loki em wanpela lesbaga rokrok husat i save pilai pilai na kusai na i no inap long painim kaikai. Em i save hamamas long kamap olsem Elvis na singsing, tasol ol arapela abus long haus kuk i no save bisi sapos em i kaikai o nogat. Ating em bai gutpela moa sapos bel bilong Loki i pulap, orait em inap hamamasim ol arapela abus? Nambawan samting em Loki i mas kamap gutpela poro wantaim ol arapela na lainim gutpela pasin bilong wok bung wantaim - em bai gutpela tru." - Isabel D'Avila Winter - Brisbane Author &Writer
"Liklik Hambak Rokrok we Joycelin Kauc Leahy i raitim i wanpela naispela stori bilong ol pikinini long olgeta hap. Dispela stori em i sut long mak bilong ol gutpela pasin bilong laikim, wanbel, na kamap gutpla poro. Stori i kamapim piksa na luksave bilong laip insait long ol ples long Papua Niugini. Joycelin i raitim dispela stori long Inglis na Tok Pisin long strongim ol tokples insait long Papua Niugini na tu, i soim olsem ol kainkain tokples inap long kamapim ol gutpela stori. - Pam Jeffs - Author Turtle Island
Naispela kala na nek bilong stori i bihainim stret stail bilong Papua Niugini. Mi laikim rot bilong kamapim stori long tupela tok ples, Inglis na Tok Pisin. Insait long stori i gat ol kain tok piksa, olsem lang i 'saitim olsem Air Niugini balus'. Nambawan stret! - Russell Soaba - Author
"Ol rokrok i soim yumi long bus i klin na wanem gutpla hap long stap. Stori bilong Liklik Hambak Rokrok na ol poroman bilong em insait long stori i makim bun bilong komyuniti long Papua Niugini. Pasin bilong sindaun gut wantaim, em bikpla samting. Long ples, yumi kisim strong taim yumi wok wantaim na yumi wok wantaim bel isi. Stori makim stret olsem strong bilong yumi kamap long graun, wara, bus na gutpla sidaun. Het tok i olsem, yumi mas lukautim gut ples. Displa liklik stori em kamautim ol bikpla hevi yumi lukim nau long komyuniti na long bus bilong yumi. Ol skul tisa i ken yusim displa stori long kamapim het tok na bungim tingting na toktok wantaim ol pikinini long luksave long ol ples, wara na graun bilong yumi tu". - Dr Julie McLaughlin Creative Industries, Education and Social Justice Faculty, QUT.
Naispela liklik stori long wanpela rokrok na ol pren bilong em long ples. Rokrok i wok long bikhet na toktok planti, tasol bihain, em i lainim wanpela gutpela samting. - Randall Karcher Multi-lingual language conservationist, long-time PNG resident.